-
مدونتنا
سنشارك معكم تفاصيل رحلاتنا السابقة و جميع المعلومات التي اكتسبناها من تجاربنا السابقة
- الرئيسية
- مدونتنا
قمة الافاعي
قصص يونيو 11, 2023من بعد نزلنا من الأطلس الكبير على تيديلي تم اكويم جينا لورزازات واحد اليومين رتاحينا انا و ياسين عند عمران، و كنا مقررين نديرو كيسان تم نكملو للنقب و ندخلو على ماسيف صاغرو نديرو قمتي قواوش و امالو نمنصور و نخرجو فتنغير من اكنيون، المهم هدا هو البلان لي رسمنا، تم قنعنا عمران يمشي معانا لكيسان و يرجع و حنا نكملو و فعلا وافق، الصباح فقنا فطرنا و مشينا ركبنا لاكدز،تلاقينا بالصديق محمد ايت مريم لي كنت تانعرفو فالفيس بوك و دوزنا معاه وقيت و عطانا بعد المعلومات و قال لينا ردو البال معا الافاعي قلنا ليه ما تخافش 😂😂 المهم كنا زاعمين زعما ،مشينا لدوار تالوين على رجلين (3 كلم على اكدز) وصلنا فوسط النهار كانت واحد الحرارة بزااف جلسنا فواحد الظليلة قلنا تايبرد الحال شوية و نطلعو حيت كنا تانقولو الحال قريب حيث الجبل كان قدامنا و حنا فالسفح تاعو ،المهم وقفات واحد السيدة و سولاتنا بيتو الما بارد قلنا ليها اه و عطاتنا قرعة باردة كانت هازاها فواحد الخنشة ،شوية و هو يدوز واحد السيد بموتور و وقف قدامنا سولنا واش تغدينا و جاوبتو لا، قال لينا بلاتي و تاصل فالتيلي و مشى حط الموتور و جا عندنا قال لينا يلاهو معايا، بينا نهزو السيكان قال لينا غا خليوهوم ما كاين لي يقيسهوم ليكوم ،مشينا معاه للدار دخلنا لقيناهوم عائلة كبيرة اللهم بارك مجموعين فدار وحدة رحبو بينا، تم جابو لينا الغدا تغدينا جابو لينا الديسير، و بدينا تانهضرو و سولونا فين غاديين قلنا ليهوم لكيسان قالو ليا راه صعيب و مشا الحال و هاد الوقت راه خطر حيث الافاعي، قلنا ليهوم لا راه مولفين و هانية انطلعو دغيا ،بقينا شوية تانهضرو تأذن العصر و قررنا نتحركو هزينا شنو خاصنا للطريق و الما بزااف و خلينا عندهوم السيكان و تحركنا ،مشينا تا قربنا ليه لقينا انه بحال حيوط واقفين و كان صعيب شوية فالطلوع من الجهة لي تاتشوف فالدوار ،كانت الطريق الساهلة هي نجيوه من اللور مي طويلة بزاااف ،المهم عمران تقصح فخضو كان تايضرو ناض عليه و قرر يرجع و انا و ياسين طلعنا معا ديك الجهة واخا كانت شوية قاسحة و عارفنا اننا ما يمكنش نزلو منها حيث ريسك، قررنا على اننا نطلعو للصومي و نزلو من اللور و فعلا طلعنا من ديك الجهة لي دات لينا المجهود و لقاتنا المغرب فالصومي و قبل ما نوصل للصومي قريت المحيط شوية و رسمت واحد الطريق لي مسلكة للنزول من اللور، و فعلا كي وصلنا تصورنا دغيا و بدينا نزلو بالزربة شوية باش ندركو الضو شوية نطيحو فديك الشعبة لي اتنزلنا للتحت و نجيبو الدورة على الجبل، ما فراسناش اننا يلاه انبداو مسلسل الرعب، المهم نازلين تا طحنة فديك الشعبة و طاح الظلام صافي و كان داك النهار ما كاينش القمر يعني الرؤية منعدمة بلى بيلات، بقينا نازلين انا سابق و ياسين تابعني شوية تانحط الرجل ليسرا تا تانسمع افعى تاتصوت بفمها حدايا كتحذير انها بغات تهجم، انا ما فكرتش و لو لثانية و داكشي جا بالزربة (سمعن الصوت، عرفتها افعى و عرفتها تاتعطيني تحذير و الصوت قريب يعني انني قربت بزااف و داك الصوت عارفتو انه ديال افعى الكبرى) بدون شعور تلاحيت القدام على ليسر واخا كانت خوية و طحت تضربت و نضت دغيا و بديت تانجري عكس الصوت و تانغوت ياسين هرب هرب و تايجاوبني مالك ا كمال تانقول و هير هرب اصاحبي هرب و تايقوليك مالك وانا نقوليه لفعى اصاحبي، و هو يقول ليا فين نهرب فين قلت ليه ليست تاعك و هو بالخلعة تلف ليه ليسر معا ليمن و تبلوكا بلاصتو تا شاف فيديه عاد تفكر ليسر و بدا تايجري ،و تخايل معايا جريت تاعيت و فاش وقفت باقي تانسمع صوتها فوذني، من تما بدا الرعب و بدينا غاديين غا فوق الحجر من حجرة لحجرة و رادين البال و تا فين غاديين باقي ما محدد، تا لقينا راسنا فاللخر فواحد القنت بحال شلال تما الصدمة، عاودنا رجعنا و طلعنا معا واحد القنت و طحنا فالشعبة الاخرى و بقينا نازلين تال واحد اللحظة تانسمع ياسين غوت و تايحنقز، قلت انا عضاتو و تخلعت، تا قال ليا ناري كنت انحط عليها رجلي ا كمال و مصدوم (مسخوط كان ايعسف على مولات الجرس فاش قرب ليها بقات تاضرب بداك الجرس و حنقز، بقينا غاديين و هو يقول ليا كمال واش الى عضاتك اتحس بيها، باقي ما متيقش انها ما عضاتوش، المهم ما سالاش الفيلم هنا حيث لقينا الثالثة مي كنا بعاد منها و لقينا حنش عادي و بعد تقريبا شي 4 السوايع المعانات لقينا الدوار اخيرا و تاصلنا بعمران و لقيناه شدوه الناس لي تغدينا عندهوم و بقاو تايتسناونا ،تا جينا و وجدو لينا العشا و تعشينا و عاودنا ليهوم اش طرا ،و قالو لينا حنا وما تانطلعوش لتما، و تما قررنا اننا نبدلو الوجهة و ما نمشيوش لصاغرو حيث تاهو معروف بالافاعي بزااف بالخصوص تاهو فيه الكبرى بزااف و القرناء، و رجعنا على ورزازات و مشينا لتنغير.